Synnøves Julekonsert går av stabelen sjette året på rad, og i år går turen til Holmedal kyrkje for første gong! Årets gjest er den unge folkesongaren Ingebjørg H. Bratland (20) frå Vinje i Telemark.

Ingebjørg er jenta som fekk Kongen til å gråte med songen sin. Og som gjest i Beat for beat og solist hos Team Tuva i Det store korslaget framkalla ho nok ein gong tårene hjå tv-sjåarar i det ganske land.

På Synnøves Julekonsert står det enkle og nære i sentrum, og det er garantert fritt for jingle-bells og glorete neon-nissar. I staden for å spele på det storslagne og pompøse, vil dei fire musikarane spele på idéen om at det enkle ofte er det beste. Gjennom å la klangen av stemmene og instrumenta forsterke melodiane og teksten, søkjer dei å formidle det store i noko tilsynelatande lite. Med dette ligg alt til rette for eit velfortent pusterom i førjulsstria!

Ingebjørg Bratland – folkesong
Solbjørg Tveiten – folkesong
Synnøve S. Bjørset – hardingfele/oktavfele
Sigbjørn Apeland – trøorgel

Vel møtt til konsert!